Аймактардын форуму-2023: ЖӨБ органдары алдыңкы тажрыйбалар менен бөлүштү
8-СЕНТЯБРЬ, 2023 – АКШнын Эл аралык өнүктүрүү агенттиги (USAID) жана Өнүктүрүү саясат институту (ӨСИ) “Аймактардын форуму – 2023” иш-чарасын өткөрүштү. Иш-чаранын максаты - жергиликтүү башкаруу жана калктын жашоосун жакшыртууга багытталган жергиликтүү деңгээлдеги кызматтарды уюштуруу боюнча тажрыйба алмашуу (мисалы, суу менен камсыздоо, катуу таштандыларды чыгаруу, билим берүү, спорт жана музыкалык ийримдер, маалымат кызматтары ж.б.).
Жыл сайын уюштурулуп келген бул форумга Жалал-Абад, Ысык-Көл, Нарын жана Ош облустарынан мамлекеттик органдардын, өнүктүрүү боюнча өнөктөштөрдүн жана жергиликтүү өз алдынча башкаруу органдарынын 130дан ашык өкүлдөрү катышты.
Акман жана Абдрахман айыл аймактарынын өкүлдөрү катышуучулар менен жергиликтүү ресурстарды жана мамлекеттик-жеке өнөктөштүктү пайдаланып, ичүүчү суу кызматын жакшыртуу жана балдар үчүн тил ийримин уюштуруу боюнча тажрыйбалары менен бөлүшүштү. Бул айыл өкмөттөр жергиликтүү бюджетти жана тарифтерди ачык талкуулоо, ошондой эле кызмат көрсөтүү процессине мониторинг жүргүзүү аркылуу жарандарды чечим кабыл алуу процессине да тарта алышкан.
«Форумдун жүрүшүндө жарандардын жергиликтүү өз алдынча башкарууга жана жергиликтүү маанидеги маселелерди чечүүгө катышуусунун маанилүү экендиги ачыкталды. Көрүнүп тургандай, ЖӨБ органдары чечимдерди кабыл алууга жарандарды катыштыруу жана билимин жогорулатуу аркылуу коомчулукта чоң өзгөрүүлөрдү жасай алат», - деди Кыргыз Республикасынын Президентинин жана Министрлер Кабинетинин чечимдерин даярдоо башкармалыгынын жетекчисинин орун басары Жетиген Бакиров.
Форум USAIDдин “Ийгиликтүү аймак 2” долбоорунун алкагында уюштурулду. Долбоор өлкө боюнча 38 пилоттук муниципалитет менен иш алып барат. Долбоор аларды жергиликтүү кызмат көрсөтүүлөрдү уюштуруунун укуктук негиздерине, тарифтерди эсептөөгө, стандарттарды даярдоого, жашоочулардын муктаждыктарын баалоого, жарандарды талкууга тартууга, мамлекеттик сатып алуулардын ыкмаларына жана кызмат көрсөтүүлөрдү уюштурууга үйрөтүп жатат.
АКШнын Кыргызстандагы элчиси Лесли Вигери, форумдун жүрүшүндө бөлүшкөн иш-аракеттердин жана идеялардын натыйжалары өнөктөш муниципалитеттер менен эле чектелбейт деп белгиледи. "Биз алган сабактар жана биз бөлүшкөн башкаруу практикалары жашоону жана коомду өзгөртүүгө жана улуттук деңгээлде туруктуу өзгөрүүлөрдү жаратуучу жөндөмгө ээ" деди ал.
Форумдун алкагында катышуучуларга аялдардын лидерлигин колдогон жергиликтүү кеңештердин Аял депутаттар клубу жана жергиликтүү кызматтарды уюштурууда мыкты практикалар менен бөлүшкөн “Теңден теңге” өз ара окутуу платформасы сыяктуу долбоор тарабынан колдоого алынган башка демилгелер тууралуу маалымат берилди.
Аймактардын форуму 2022-жылдан 2025-жылга чейин USAIDдин “Ийгиликтүү аймак 2” долбоорунун алкагында өтүп турмакчы.
